李澤鉅嘲GMT要讀書　沽空機構反擊：有根有據

【蘋果日報】沽空機構GMT在長和（001）股東會前夕發表報告，批評集團改動會計賬目谷高盈利，以及隱藏債務換取廉價貸款，要求投資者避開這隻股票。「小超」李澤鉅昨在股東會反擊，除了揶揄要多讀書才能讀懂長和財報外，更指這間機構「想搵食」。撰寫狙擊報告的研究員Mark Webb回覆本報查詢時，強調報告有根有據。
記者：周家誠
長和主席李澤鉅在父親李嘉誠退休後，昨首次主持股東會，期間心情大靚，不時大篇幅回應股東問題，而股東對於李澤鉅似乎亦甚為歡喜，不時報以熱烈掌聲。
有多名股東在會上問及GMT狙擊事件，李澤鉅趁機大反擊：「呢間公司係長江和記，一定係專業，一定係正確，我哋份財報經內部、第三方核數師審核，三間評級機構同銀行都話冇問題。我哋希望提供清楚透明嘅資料，就係因為太多，所以我哋財報成本電話簿咁厚，要讀多啲書先睇得明。」
GMT：曾向長和詳列問題
李澤鉅續說：「不過睇唔明就要搵我哋，點會唔明然後話我哋錯，話我哋隱藏咗啲嘢，你喺我份年報搵又點會隱藏嘢。」不過GMT狙擊報告結語部份，提到曾以電郵方式向長和投資者關係部提出憂慮，但沒有回覆。Mark Webb昨晚向本報重申，出版前已向長和詳細列出問題及憂慮。
有股東問長和可以如何對付GMT，李澤鉅笑說：「唔使對付啦，冇人關心，銀行、regulator、大股東都唔擔心，人哋搵食啫……係『想』搵食啫。」
曾稱「最緊要幫股東賺到錢」的李澤鉅，在股東會上回答問題較記者會更直率。有股東問到董事局成員年紀較大，有沒有更換打算，李澤鉅首次大派定心丸，解釋做生意是經驗及火候，而不是體能，「咁多位董事對我係亦師亦友，我恨不得攬住董事希望佢過啲火候畀我。」
被股東問到貿易戰對集團影響時，李澤鉅提到公用業務影響微乎其微。屈臣氏生意如化妝品不受經濟影響，抗跌力非常高。碼頭業務方面，由於各國碼頭服務不同市場，此消彼長下，對於EBITDA影響只是0.5%。
股東批評長實派息偏低
到下午長實（1113）股東會，有股東批評長實派息偏低，李澤鉅指派息不應逐年看，「我哋保留現金，如果有新項目，個War Chest大，做刁可能性就高咗，仲可以做世界級大刁，唔能夠失去呢個機會。」
亦有股東批評長實土儲不及其他發展商，李澤鉅解釋：「地產係老本行，但地產都有周期性，有時賺好多，有時未必，有試過好辛苦嘅時候；有強現金流項目，就可以補充地產周期，喺唔好嘅年代平買土地，所以土儲有時多、有時少。」李澤鉅早前指長實酒店資產被低估，有市場人士估長和或有機會出售以反映價值。他昨補充指估值低並不代表要出售。
最後有股東問李澤鉅有沒有培養下一代接班計劃，股東會登時全場大笑，李澤鉅表示，「我都想忍住唔笑，細啲吓嘛？如果係其中一員，我會高興，但太早喇。」
長青網 - 一站式長者及護老者生活資訊網站