誰能代替韋奕禮？

【明報專訊】證監會行政總裁韋奕禮做咗兔年吉祥物，噚日佢出席上市公司商會嘅酒會活動，好多嘉賓爭住同佢影相，佢都滿場飛同大家拜年。韋奕禮今年6月離任，9月就去英國做消費者保障及巿場管理局（CPMA）行政總裁。小琴之前睇過英國嘅資料，韋奕禮過檔要減人工。小琴就向佢求證？佢不斷話呢個係公職。即係話為公職減人工都肯。

為公職肯減人工

韋奕禮嘅繼任人選仲未有決定，證監會主席方正都好頭痕，佢話要搵一個有視野、國際經驗嘅人唔容易，家交畀獵頭公司幫手。坊間話搵外籍人士好啲，少啲本地裙帶關係，做事更俐落。方正話廉署、司法機構都有好多本地人，佢哋表現出色，所以證監會行政總裁一職，唔應該拘泥係咩國籍。政府早前話會成立遴選小組，小琴聽聞，財政司長曾俊華都會參與揀蟀。