90後公務員上車：自住都怕跌

【蘋果日報】「買樓自住唔怕跌」這句買家的話講足多年，任職紀律部隊的90後王先生就話「買樓自住點會唔怕跌，層樓都係你嘅資產」。投身社會六年，月月儲逾萬元，未到30歲已儲逾百萬元，自言買樓主要靠儲蓄，去年初他以590萬元，買入遠展（035）及市建局合作發展的深水埗傲凱一房戶，成功上車。
傲凱驗樓有94分
王投身社會後學人炒股，早年奉行炒波幅策略，市好時連續幾月每月賺幾千元，但事實上「依家手頭上揸嘅股票都蝕，冇賣到出去」。股票市場交不少學費，「最差嗰陣，賬面輸到六位數，依家偏向穩陣長線投資」。
工作六年，王每月儲蓄逾1萬元，未夠30歲積蓄已逾100萬元，「見手頭上夠資金，屋企人又可以幫少少，覺得可以買到就買咗先，買樓主要靠儲蓄」。「你買樓唔會齋諗話自住，除咗自住，第時放租、出售，究竟容唔容易畀你咁做，都要諗埋。買樓冇可能唔諗個投資價值！自住都怕跌，自住樓都係資產！」睇青衣二手樓，經紀介紹深水埗新盤傲凱，「揀呢度主要睇間隔、地區。中資發展商就盡量避免，睇親質素差少少，最近咪啟德龍譽。交樓質素嚟講，就算邊個發展商都唔會抱太大期望」。
他購入傲凱一房單位，實用287方呎，最近收樓。資深驗樓師賴達明「明哥」負責驗收他單位，指交樓質素算不俗，只是幾處瑕疵，例如浴室企缸玻璃浴屏門鉸刮花、露台門邊有隙及防水膠邊破損。至於客廳與睡房之間磚牆容易受冷縮熱脹影響，出現一條較長收水裂紋，可要求發展商派員執油，驗樓評分有94分。
記者：陳家雄
長青網 - 一站式長者及護老者生活資訊網站