【會師中環】逃犯條例是大型勒索

【蘋果日報】
「大劉」劉鑾雄於昨天撤回對《逃犯修例》的司法覆核，並於聲明中表忠，指自己是愛國商人，並非針對政府。大劉忽然轉軚，碰巧又有人放風會對條例的追溯期作出改動，然後大家都明白，大劉同政府已經傾掂數，司法覆核只不過是做吓樣。大劉不是傻人，他自然明白司法覆核是擋不了硬任務，畢竟尚有人大釋法這一尚方寶劍，相信他覆核的目的只有兩個：一是表面談判成功，然後暗中再走佬；二是談判失敗，靠覆核買時間走佬。殊途同歸，都係要離開。
大劉之所以要咁做，係因為這次修例比廿三條更厲害的地方，是不單止要拉人，更要封舖。廿三條拉嘅係異見人士，通常佢哋都係財產不多，並不符合貿易戰下國家缺財、要拉人罰錢的「范冰冰模式」；但在逃犯條例下，儘管你是愛國商人，但你會逃稅，那就可以「拉人封舖罰錢充公財產」一條龍服務。
按此推論，接下來就會發生一堆「唔畀錢就拉你返大陸」、到最後就用錢解決的糾紛，始終在大陸用錢解決到的犯法，就不是犯法。說到底，逃犯條例就是一次大型勒索，放把刀喺你條頸叫你交贖金，這方面，相信名下公司剛被罰2,000萬元人民幣的前全國政協常委陳永棋感受最深。
神仙丁
《審計搵丁》負責人
http://facebook.com/AuditSlave/
本欄逢周五刊出
長青網 - 一站式長者及護老者生活資訊網站