五糧液狀告七糧液

【明報專訊】小琴十指不沾楊春水，點滴烈酒也不沾口，雖素聞五糧液好酒馳名，但未曾親嚐，之不過，神州近排爆出一則法律糾紛，原來內地有人搞咗種叫「七糧液 」嘅烈酒，搞到五糧液勁㷫，終於興訟質疑「七糧液 」侵權，並要求「七糧液 」立即停產及停用商標，家陣北京法院已受理此案。

內地報章：贏訴訟 輸風度

講開又講，這類侵權訴訟，係歐美世界好普遍，話告就告，之不過，內地人好開放，小琴讀內地報章相關的文章，又有好多唔同睇法，有說呢類「旁商標」喺大陸多如牛毛，有大陸汽車品牌叫奧拓，跟奧迪撞個正，但奧迪都冇興訟，故認為五糧液隨時贏咗訴訟，會輸咗「風度」，又話五糧液之前搞過隻九糧液，照理五糧液法律訴訟勝算較高……。

小琴心想，內地「旁商標」勁多，有人見周大福係珠寶業老字號，五六年前就出現間珠寶行叫「周六福」，稍有近視又唔記得戴眼鏡，隨時將周大福同周六福撈亂，但至今都未見周大福有乜法律行動，彤叔嘅胸襟，睇嚟廣闊好多。