中壽海外儲茅台 自備宴客

【明報專訊】內地百物騰貴，就連用嚟宴客嘅高檔白酒貴州茅台，售價亦不斷飈升，但小琴噚日同中壽（2628）海外眾高層飯局時，就見佢哋好客氣開咗兩支53度飛天茅台，雖然市面上充斥「老翻」茅台，但總裁劉廷安就強調，佢哋請飲嘅茅台絕對百分百原裝正版。

劉廷安解釋，因為母公司中壽集團係內地貴州茅台主要股東，因此中壽海外可以直接喺貴州茅台倉庫嗰度入貨，佢仲透露，佢哋已預先入定數十箱茅台，即使要去深圳宴客亦會自備茅台，唔使捱貴貨之餘，更重要嘅係包唔會飲到假貨。

而真假茅台點樣分，同場嘅中壽海外總裁助理于泳就坦言兩者難以辨別，因為口感十分相似，但假茅台飲完之後翌日身體會感到不適。計小琴話，唔識分真假屬次要，最緊要投資夠眼光，茅台每瓶售價喺短短3年間由300元人民幣漲至逾千元人民幣，怕且佢地母公司投資貴州茅台都應該賺唔少啦。