新聞類別
財經
詳情#
【明報專訊】上市唔夠一年嘅康宏理財（1019）噚日股價抽升成交急增，小琴即刻四圍打聽吓佢哋有乜搞作，探子回報嘅消息都幾驚人，話有人對康宏旗下嘅期貨業務打主意，而金主不是別人，正是近年撈到風生水起嘅黃國英是也！
黃國英家係豐盛金融資產管理嘅董事，據聞黃生幫佢啲客戶炒股炒得有聲有色，黃生自然亦都豬籠入水，加上可能係代客出面，所以呢個消息都唔係話冇可能。作為一個專業嘅新聞從業員，小琴當然第一時間打畀黃國英求證，點知抱恙中的黃國英劈頭就話﹕「唔清楚，首先自己冇咁嘅行動，亦冇幫任何人穿針引線，但公司嘅corporate finance部門的確同康宏嗰邊素有來往。」
至於康宏嗰邊，因為「鬍鬚仔」王利民（即係康宏主席兼執行董事）外遊，所以聯絡唔上佢，不過鬍鬚仔啲伙計都好幫得手，聽完小琴嘅查詢後，好快就有回覆，而答案就係：「管理層冇聽過有關消息」。哦，收到！
康宏：管理層冇聽說過
雖然古語有云「空穴來風必有因」，康宏股價噚日又一度急升超過一成，成交仲倍增至過千萬蚊；不過兩邊都否認得咁徹底，康宏招股書以至年報又對旗下期貨業務冇乜着墨，苦無線索之下，小琴唯有拭目以待，睇吓將來康宏有乜大動作啦。
報料電郵﹕piano@mingpao.com
回應 (0)
