新聞類別
財經
詳情#
【明報專訊】樓市狂潮下，樓齡成40年的中半山豪宅都貴到飛起！有代理向小琴報料，一直係達官貴人居住嘅馬己仙峽道嘉慧園，一個位於高層C室，面積3700方呎，剛以約8000萬元售出，呎價高達2.16萬元，創出屋苑呎價新高紀錄。小琴心想，呢次創出新高呎價，亦都益咗住喺低層嘅前特首董建華，佢個單位揸咗近廿年，原來市值已勁升15倍！
500萬買入 現值8000萬
翻查土地註冊處資料，董伯夫婦早喺91年11月僅以約500萬元買入，當時呎價都只係1351元，家用呢個呎價，想買屯門天水圍私樓，甚至新界居屋都未必得，可見港紙之縮水。雖然佢個單位係低層，但由於區內同類供應不多，市場估計家呢個單位現值約8000萬元，相比起佢近20年前嘅買入價，市值足足升咗15倍。
聽中原高級分區經理蔡亞當報料，話家區內根本無人願意放盤，就算放盤都要天價先賣，令呢類物業樓齡即使要成40年，呎價亦創出新高。佢又話，今次以約8000萬元、呎價2.16萬元刷新屋苑呎價新紀錄嘅單位，原業主喺09年11月僅以5500萬元買入，個時呎價都只係1.49萬元，但經呢次轉讓帳面勁賺2500萬元，持貨短短兩年多，物業已勁升約四成半。
報料電郵﹕piano@mingpao.com
回應 (0)
