恒指公司﹕噚日港股唔算恐慌

【明報專訊】恒生指數公司最新力作港版「恐慌指數」——恒生波幅指數（VHSI），推出第二日就遇上恒指急跌400幾點，「恐慌指數」上半晝就經已升至接近20點，恒指公司董事兼總經理關永盛噚日同一眾傳媒食飯時就話，公司以過去10年恒指走勢計算，「恐慌指數」平均係25點，而最勁就係雷曼爆煲之時，恒生波幅指數可以去到104點，所以噚日升到去接近20點，只係濕濕碎咋！

恒指公司近年推出唔少指數，小琴聽關永盛講，佢哋公司今日都會繼續研究推新產品，例如係外國好興嘅策略指數，另外仲有一個可能影響大部分股民嘅計劃，就係研究將恒指「加速」！

研究將恒指報價加速

話說恒指呢十幾年嚟，都係每隔15秒計算同實時發布，關永盛話佢哋研究將報價時間縮短，但就冇話目標要縮到幾短，相信今年內可決定加唔加速。據關生講，美國道指每兩秒報價，咁恒指每隔15秒先報價咪形同「龜速」？其實又唔可以咁講，因為歐洲大部分指數都同恒指一樣，做緊每隔15秒報價，所以如果恒指公司最終決定縮短報價時間，就係名副其實嘅超英趕美喇！