顧明均披甲上陣 南太更賺錢

【明報專訊】小琴記得兩年前，南太電子提出私有化，大股東顧明均眼泛淚光，向小股東講公司業績做得唔好，愧對他們。南太完成私有化後，仲請小股東去四季酒店豪食自助餐，小股東似乎都好滿意。之不過，南太私有化完成後，究竟盤生意又做成點？

原來南太私有化後，顧老闆披甲上陣一年幾，噚日同小琴講生意做番啲起色。仲喺美國納斯特克上市的南太，2010年全年銷售量按年升31％，盈利增加27％。佢話以前盤生意交畀管理層負責，發覺佢哋數口唔夠精，營運費用多咗。

想搵人接掌公司

顧老闆重出江湖之後，睇緊晒啲運作，每個星期都去深圳巡廠，每個月又會去無錫工廠跟進，公司好快做出成績。近期內地加咗最低工資，顧老闆話成本增加好多，因為佢哋出手較高，深圳及無錫員工平均月薪分別4000及5000元人民幣，折算港幣為4733元及5917元，無錫嘅人工已超過本港最低時薪28元（約月薪5824元）。顧老闆今年67歲，佢話好想搵適合人選接掌公司，等佢可以歎世界、歎紅酒。