新聞類別
財經
詳情#
【明報專訊】據英國《金融時報》報道，作為本港大型發展商郭氏家族，正與英國房地產集團Capital & Counties傾緊倫敦西區Earls Court一個極貴重地皮嘅重建項目，講緊嘅投資金額話達幾十億英鎊，即折合成幾百億港紙！
郭老大拒評 新地「未有嘢講」
嘩咁大個項目，會唔會同籌組緊房地產投資基金、曾講過另起爐灶嘅郭炳湘有關呢？小琴噚日試過搵佢，不過，郭老大的發言人話郭生好忙，唔會就事件作任何評論，不過喺呢件事上面，家族會知得多啲。言下之意，即係今次單刁，可能係二弟郭炳江與三弟郭炳聯的投資。小琴嗱嗱聲打去新地方面了解，但果邊發言人只係話「家未有嘢講」，拒絕回應。
據該報指出，項目將會興建8000個豪宅單位、400萬方呎寫字樓、以及75萬方呎商舖。萊坊國際投資部董事李丹翔話，Earls Court位於倫敦一線核心商住地段，距離有近200年歷史的知名百貨公司Harrods僅幾分鐘車程，位置甚佳，亦地處地鐵沿線，交通非常方便。而且咁大又咁靚嘅發展項目，喺當地非常罕見，加上明年英國舉辦奧運，所以前景非常樂觀咁話。
涉數十億鎊 擬建8000豪宅
他指，以項目鄰近的住宅而言，一般一個面積約1100方呎的2房單位，約售140萬英鎊，即約1764萬港元，折合每方呎約1.6萬港元。雖然倫敦的高檔住宅發展蓬勃，附近如Knightsbridge亦創出價格新高，不過與香港動輒幾萬蚊1呎的豪宅比較，似乎仍有唔錯嘅上升空間。
報料電郵﹕piano@mingpao.com
回應 (0)
