柴灣「流拍」地 變身墳景公屋

【明報專訊】政府為冷卻樓市，舊年主動拍賣多幅地皮，其中毗鄰墳場嘅柴灣連城道住宅地皮，最終喺舊年9月底，因發展商對呢幅地全無興趣，最終開拍5分鐘便「流拍」收場，成為16年以來政府首次收回嘅拍賣地皮。不過，事隔唔夠半年，昨日發展局長林鄭月娥係公布新一年度賣地計劃時就話，房委會對呢幅地有興趣，計劃將呢幅地興建公屋。

呢幅地皮面積19418方呎，以8倍地積比率計算，可建樓面約15.53萬方呎，若以當日政府開價5.3億元計，即每方呎樓面地價最少都值3412元。若簡單以每伙面積約500呎計算，估計可提供約300個公屋單位。以每戶4人家庭計算，都可以為約1200人解決住屋問題。

料可建300個單位

小琴仲記得上年流拍的拍賣會，五大發展商包括長實（0001）、新地（0016）、恒地（0012）、信置（0083）、新世界（0017）都有出席呢幅地皮拍賣，連多間中小型發展商都有派代表到，但只係你眼望我眼，更被拍賣官3度警告後收回地皮，連拍賣官對呢次拍賣結果都感到驚訝。呢幅地皮雖然「享有墳景」，但話晒都鄰近港鐵柴灣站，日後居民出入都尚算方便。

另外，林鄭昨日亦都提到，除咗柴灣呢幅地外，大嶼山梅窩亦將有地起公屋，而呢幅地以往亦曾放喺勾地表內。有記者問及，梅窩較遠離市區，究竟點樣可以吸引人入去住，佢就只係話呢方面要問運輸及房屋局。

報料電郵﹕piano@mingpao.com