富力遇上滬「質量門」

【明報專訊】今日小琴看到內地媒體廣泛報道富力地產（2777）遇上「質量門」事件。上海桃園的300萬豪宅，天花板以垃圾填充，外牆變形､滲水；海口的盈溪谷新房與樣板房嚴重不符，豪華精裝修被斥為粗製濫造，承諾附送的樓梯也未兌現，業主集體拒絕收樓……。

小琴其實同富力嘅主席李思廉有過幾面之緣，感覺佢為人穩重，講話踏實，而且有邏輯。但小琴馬後炮覺得，今天嘅事態早有端倪。一次係喺廣州亞運城嘅推介會上，當被傳媒問及鍾意住亞運城定係自己嘅樓盤，李生斬釘截鐵地回答係亞運城，因為政府嘅力量遠大於開發商嘅力量。諗諗呢番話都真係幾誠實，自己樓盤咁多問題，點都唔會住啦。

又有一次，被記者問及質量問題，佢坦言，冇一個開發商係冇質量問題，規模愈大，暴露出嚟嘅問題自然愈多。當時小琴覺得此邏輯渾然天成，無言以對，但李生確實對於質量問題太處之泰然了。