聯通推「沃Phone」殺入智能手機平台

【明報專訊】「iPhone」就聽得多，唔知「沃Phone」大家又有無聽過呢？等小琴話過你知喇，「沃Phone」原來係聯通（0762）最新推出嘅智能手機平台，見iPhone喺內地大受歡迎，聯通實行要令到國產手機平台抬起頭來，同Google嘅Android平台、蘋果嘅iOS、以及最近伙拍諾基亞嘅Windows Mobile一決高下。

獲多個手機品牌力撐

內地傳媒話，聯通今年打算開拓推100萬部「沃Phone」手機，希望國際品牌可以佔一半以上。聯通喺發布會上，已經得到Motorola、Samsung，國產品牌華為及中興力撐，出產「沃Phone」嘅手機。大家梗係即刻想問去邊度可以下載Apps（應用程式）喇，聯通將會有「沃商店」，目前已經有200個「沃Phone程式」，當然同蘋果Apps Store超過32萬個Apps比較，有一段相當大嘅距離喇。

聯通今次得到國家財力支持，成個「沃Phone」投資超過2億元人民幣。不過，唔知大家仲記唔記得喺2009年，有一間營運商推出一個叫「OPhone」嘅平台，就係中移動（0941）喇，至今發展成點，恐怕冇咩人知曉。