One Island South 龐維仁1.8億買全層

【明報專訊】會德豐（0020）近排突然推售旗下位於黃竹坑香葉道「One Island South」，有市場消息指，曾一度同剛添丁嘅影星李嘉欣傳過緋聞嘅龐維仁，上周斥約1.8億元購入呢幢大廈其中一個全層，涉及樓面約2.98萬方呎，呎價約6000餘元。據小琴所收風聲，龐生打算留作自用。

佢大佬龐維新近年大搞田生（0183），喺地產界大展拳腳，細佬龐維仁近年就鍾情娛樂事業，去年已注資約10億元喺金牌大風，啱啱喺今年初仲接替鄭東漢（影星鄭中基父親）做金牌大風主席，更曾一度傳出，金牌經理人黃柏高由於同佢唔咬弦而離開公司。金牌大風旗下藝人眾多，包括鄧麗欣（Stephy）、吳雨霏（Kary）、側田、小肥、鄭中基、梁漢文同方力申等。