新聞類別
財經
詳情#
【明報專訊】香港警隊其中一位前一哥曾蔭培，家做咗彤叔旗下新創建（0659）嘅執行董事，新創建早年同鐵道部組成合營公司，搞內地集裝箱鐵路運輸項目。大家見到前一哥，自然問佢前鐵道部長劉志軍案對公司有冇影響，曾蔭培即刻話冇影響，但原來佢哋喺去年10月，已經聞到風聲，知道有大鑊，因為連鐵道部派來做合營公司董事長嘅官員都被撤換。
新創建同鐵道部合組嘅公司，叫做中鐵國際聯合集裝箱（簡稱﹕中鐵聯集），喺內地已經取得18個鐵路集裝箱中心站，家有8個已經營運，部分並且開始賺錢。呢個項目可以話係新創建未來重點發展。
前一哥話，去年10月佢哋突然被通知，當時嘅中鐵聯集董事長羅金保被任免，佢話羅金保都係加入中鐵聯集，做咗幾個月董事長就被撤職。當時內地A股上市的鐵龍物流亦都發咗公告，話羅金保被免職，大家都有啲一頭霧水。
去到今年1月初，內地就傳出羅金保被雙規。然後去到農曆新年後，中央公布劉志軍落網，牽連羅金保同山西女富豪丁書苗（相關新聞見B2），大家就終於水落石出，知道發生咗乜嘢事。但前一哥話，喺羅金保離職之後，鐵道部好快就派另外一名官員過來做中鐵聯集嘅董事長，佢哋嘅業務亦一切如常，冇受影響。
問特首傷勢 「食飯時心口痛」
另外，大家當然會問起前一哥嘅大佬，特首曾蔭權嘅傷勢。曾蔭培話佢噚日朝早都有打電話畀特首，問候吓佢，特首同佢講都係因為前晚食晚飯時，覺得心口愈來愈痛，先至去醫院做檢查。
報料電郵﹕piano@mingpao.com
回應 (0)
