詹培忠介入「分燊家」

【明報專訊】賭王何鴻燊爭產事件七國咁亂，立法會議員詹培忠仲叉隻腳埋去。佢噚日喺立法會問財經事務及庫務局長陳家強，澳博（0880）股權糾紛涉及上市公司主席何鴻燊，監管當局有冇評估賭王嘅言行，仲係咪適合擔任上市公司主席？呢次糾紛影響投資者信心，點解當局唔要求澳博停牌？

陳局長話聯交所同證監會一直監察澳博事件發展，一般嚟講，除非有不尋常兼虛假市場情况，否則會繼續畀股份買賣。至於賭王係咪符合條件留任董事，局長話唔評論個別個案， 如果聯交所認為某人唔適合做公司董事，聯交所可以要求上市公司採取補救行動，例如召開股東大會罷免該董事。若果董事持續唔履行其責任，聯交所可以啟動紀律程序，公開聲明有關董事繼續留任會損害投資者權益，甚至要求停牌、取消上市地位……。

小琴心想，仲記得詹議員90年代挑戰證監會，證監會指佢作為上市公司德智發展董事，違反董事誠信，佢就反控告證監會處理失當，引發一連串風波。經一事長一智，詹議員果然熟悉晒董事責任要求，反過嚟，便深明政府應該如何監察澳博。