「地產狂人」孫宏斌 狂言人仔兌美金1比1

【明報專訊】融創中國（1918）主席孫宏斌噚日出席業績發布會，佢話今年會發美債，又話睇好人民幣發展。佢話人民幣發展超乎想像，誇下海口稱將來有機會人民幣兌美金1比1。噚日兌換率報美金1蚊兌人民幣6.57，如果兌換率真係1比1……真係難以想像到時係咩世界。小琴即時諗到，持有最多美債嘅中國會點呢？

被問到買地策略，孫宏斌話下半年先至係買地好時機，因為上半年內地收緊資金，下半年競爭對手陸續水緊，相信會少啲人搶地，佢仲話現金流要審慎處理。呢位狂人曾經搞過房地產開發公司天津順馳，但公司擴張過急，負債高企，再撞正內地宏調，佢將一手創立嘅江山賣畀路勁（1098）。孫宏斌對呢件事記憶猶新，噚日特別話自己交過學費，會審慎行事。融創公布去年全年業績，盈利升77％至15.4億人民幣，毛利率升15個百分點至43％。