空巴打造空中竹戰行宮

【明報專訊】空中巴士（Airbus）嘅私人飛機生意，一直由中東客主導。隨着大陸豪客增加，空巴話預計幾年後，大陸客會成為私人飛機市場主要客戶。空巴至今賣咗超過170架私人飛機，大陸佔咗逾20架，空巴估計以後訂單陸續有嚟。

空巴噚日公布同香港飛機工程（0044）合作，港機附屬嘅廈門太古飛機工程（TAECO），成為空巴喺亞太區首個改裝中心。連埋廈門中心，空巴現時有8個改裝中心，2個喺美洲，5個喺歐洲。業界話呢次合作，明顯係針對大陸私人飛機市場，搵番中國人同大陸客戶溝通，例如：客戶想加設麻將枱，想點樣擺放，中國人做番改裝工作會方便啲。私人飛機價錢差異好大，小琴記得港機行政總裁鄧健榮接受訪問時講過，買入一架私人飛機約要1億美元，折算約7.8億港元，改裝費約需8000萬港元。如果改裝得豪華啲，閒閒地過億元。

港機廈門廠負責改裝

空巴預測未來業務發展，都會以亞太區為主。預計到2029年，亞太區會接收8560架新飛機，總值1.2億美元，佔全球新飛機33％，成為全球最大航空市場。不過，大陸都開發緊國產型客機C919，預計2014年首飛。國產機一出，仲會唔會同空巴訂貨？空巴高層話都有競爭力，會密切監察情况，內地訂貨暫時反應良好。早前南航（1055）訂咗5架A380，今年下半年會接收第一架。

報料電郵﹕piano@mingpao.com