梁高嘆湊B難過做大班

【明報專訊】相信好多人都知今日係三•八婦女節，無論係家庭主婦，抑或職業女強人，都應該被歌頌。香港傑出女性代表中，其中嘅佼佼者不能不數恒生銀行（0011）副董事長兼行政總裁梁高美懿，作為女大班嘅佢，家庭事業兩得意，就叫好多女性羡慕得很。

恒生高管 女將如雲

三•八婦女節今日原來有成一百周年歷史，梁太亦忍唔住喺佢嘅博客講吓作為事業女性嘅感言。憶述返廿幾年前囡囡出世，佢一度諗住放棄工作，留喺屋企陪個女成長。喺職場無嘢難到佢嘅梁太，對湊B卻高呼怕怕：「在朝夕「餵奶」、換尿片嘅日子裏，我發現原來當全職媽媽比當行政人員還要難。」於是佢決定返到工作崗位，家庭事業兩邊顧，仲成功升上恒生女大班一職呢！

綜觀本港銀行，恒生的確特別多女性高管，例如恒生中國副董事長兼行長薛關燕萍啦，高級管理人員中又有5位助理總經理級嘅女性坐鎮，連管理培訓生（MT）之中，都有超過一半為女性，話恒生「女將如雲」一啲都唔誇張。