前大班龐約翰「掘礦」 股東唔撐佢

【明報專訊】匯控（0005）前主席龐約翰（係John Bond、唔係James Bond）做完賓架、電訊大亨，最新動向係做礦業巨子，不過聽講佢空降英國採礦商Xstrata出任主席，一班基金股東就唔多like，唔知會唔會影響佢「掘礦」大計。

英國《每日電訊報》噚日報道，Xstrata部分機構投資者對於龐約翰將於今年5月，接任施特羅霍特主席一職，感到「失望」，仲話Xstrata董事局作出決定之前，完全冇同基金股東討論……。報道冇講清楚，點解呢班機構投資者唔鍾意龐約翰，小琴胡亂猜測，唔通同佢喺獅子行打骰時收購美國Household衰咗有關。

機構投資者感「失望」

話時話，揸住Xstrata超過三成股權、全球最大商品交易商Glencore，可能已委任英國石油（BP）前管理層Rodney Chase出任主席，為嚟緊公司喺倫敦同香港上市作準備。之前一度傳聞前渣打主席戴維斯都有份角逐呢個職位，但《泰晤士報》就話，Chase原則上同意接受Glencore任命，戴維斯就拒絕咗。