陳德霖過料人大政協 洗港污名

【明報專訊】人大及政協兩會，開足近兩個禮拜，來自香港的人大代表加政協委員逾百人，有機會同唔少內地部長、高官、國企老總等交流交流，實在係溝通國情之良機；原來香港有位高官，好想把握呢個機會，之前特登搞咗兩場Talk，過啲料畀人大代表同政協，希望各位香港代表幫香港講番多幾句好說話，澄清一啲誤解，此人就係金管局總裁陳總陳德霖。

小琴聽一啲代表講，金管局今年特別喺佢地上京前一、兩個星期，搞咗兩場講座，陳總親自講Talk，詳細解釋香港家嘅人民幣業務發展和數據，又分析香港作為人幣離岸中心的日後走向，等兩會代表去到北京，可以講清楚香港有幾掂，可以點幫手推動國家人民幣國際化，仲有好重要一點，就係要澄清冇熱錢通過香港人民幣離岸中心呢個平台，返入去衝擊大陸金融體系。

盼助推動人幣國際化

有委員話，陳總咁緊張，原因應該係去年11月央視節目《經濟半小時》話香港囤積咗10萬億元熱錢，會衝擊內地市場。雖然其後已知全因誤讀了一分析員嘅意見，但係都好似話引起內地不同部門同埋機構的關注……。

陳總心繫香港人民幣離岸中心的大業，時刻把握機會，開創溝通新風氣，確實扺讚。不過小琴較為小心眼，問有關委員會唔會反映陳總的內地人脈未及任總，抑或係金管局對直接對口單位人行行長周小川影響力有限，委員就話，無論原因係乜，以佢了解任總嘅強人風格，要陳總好似任總，相信就比較難囉。

小琴報料，都唔會只聽一面，金管局噚日就覆返小琴，話金管局不時會舉辦工作坊，向公眾人士介紹本港人民幣業務發展，至於陳總喺工作坊的講話內容，就不便置評了。

報料電郵﹕piano@mingpao.com