呂耀東唔講爭產 祝賭王早日康復

【明報專訊】自從賭王何鴻燊屋企爭產事件曝光以嚟，一直成為中港澳熱話，噚日仲有報紙話連濠江前特首何厚鏵都介入做和事老，同樣喺濠江開賭嘅銀河娛樂（0027），公司副主席呂耀東噚日被問起，事件對澳門賭業嘅睇法時，Francis即時耍手擰頭，話清官難審家庭事，佢作為外人更加無嘢好講。

雖然話同行如敵國，話晒何氏家族同呂氏家族都係社會上有頭有面嘅人，答完以上呢個標準答案，Francis仲補多句，祝賭王早日康復、心想事成同埋萬事如意！

銀娛喺澳門嘅新度假村會喺今年5月中開幕，有記者問呂耀東，係咪睇準香港政府派六千蚊畀市民嘅時機，佢就笑笑口話唔係，不過相信果6000蚊一定幫到手喎。小琴喺度提醒Francis，由銀行到保險業都吼實果6000蚊，想盡辦法吸錢落袋，加埋濠江賭業各本地薑及過江龍對手，爭呢六千蚊競爭都好激烈㗎！