4500元來回斐濟 過復活節

【明報專訊】下月中又到復活節長假期，各位讀者有無心思思想出外遊埠呢？小琴話你知，南太平洋斐濟島國風和日麗，有得玩浮潛，仲有地道村落，加上可以去周圍荒島歷險，不失為一個避世佳選，原來斐濟太平洋航空喺舊年，已經開咗一條由香港直航飛去斐濟嘅航線，等香港人可以直飛去當地享受陽光與海灘。

斐濟太平洋航空擬拓港客源

位於南太平洋的斐濟共和國，就喺新西蘭對上，係其中一個以國際時區計，最早見到日出嘅地方。小琴噚日聽斐濟旅遊局總裁Josefa Tuamoto講，好多遊客去到斐濟，唔經唔覺都會感覺到自己比當地愉快嘅氣氛感染到。斐濟太平洋航空營銷總裁Josef Loew亦話，以往斐濟主要以一班歐美客為主，家該公司將會積極開拓香港飛斐濟嘅航線。聽落好似都幾吸引，而且早喺2007年斐濟已畀咗持特區護照的港人，免簽證待遇，可逗留6個月。

若然乘坐斐濟太平洋航空4月出發，來回程盛惠4500元，都唔算貴，之不過，小琴心想，由香港飛斐濟嘅航程，都要成10個鐘以上，各位若然坐唔慣長途機，就要諗清楚喇。