顧紀筠八千萬 做董建華鄰居

【明報專訊】著名藝人「顧老闆」顧紀筠與老公思科（Cisco）高層陳仕偉，一向投資有道，喺樓市贏多輸少，最近小琴發現佢哋，愈買愈豪，剛斥8000萬元進駐有「特首府邸」之稱的中半山嘉慧園高層單位，「騎住」喺樓下住嘅前特首董建華。

一直係達官貴人居住嘅馬己仙峽道嘉慧園，一個位於高層C室，面積3700方呎，近日以8000萬元售出，呎價高達2.16萬元，創出屋苑呎價新高紀錄。土地註冊處顯示，單位由寶輝顧問有限公司購入，公司董事為顧紀筠與陳仕偉，報住西半山寶珊道寶城大廈。

SARS買玫瑰園 勁賺逾半億

近排愈來愈多人懷念前特首董伯，董家早喺1971年僅以47.68萬元買入2樓單位，當時呎價都只係129元，市場估計家呢個單位現值亦達約8000萬元，相比起佢40年前嘅買入價，市值足足升咗160餘倍。

賣單位畀「顧老闆」嘅原業主，喺2009年11月僅以5500萬元買入，嗰時呎價都只係1.49萬元，但經呢次轉讓帳面勁賺2500萬元，持貨短短兩年多，物業已勁升約四成半。

「顧老闆」夫婦兩人買樓，真係可謂賺到笑，最經典一役喺SARS期間，以3000萬元買入的大潭玫瑰園洋房，於2007年10月以8380萬元售予景賢里前業主、「話梅大王」邱子文的後人邱木城，勁賺逾半億元。

報料電郵﹕piano@mingpao.com