王傳福記者會蝦碌 營業額講錯GDP

【明報專訊】比亞迪股份（1211）董事長王傳福唔知係咪太過掛念內地兩會嘅情况，噚日無喇喇喺香港業績記者會上講，「我們的GDP增長……」正當台下成班記者充滿問號之際，王傳福更正話「我們的營業額增長……」其實又好難怪王總，事關比亞迪汽車舊年嘅銷情麻麻，拖累業績差過預期，股價表現更加每况愈下，可能喺種種不如意交錯之下，令王總喺記者會都顯得心不在焉。

比亞迪當日受股神巴菲特點石成金，令到股價三級跳，一度逼近90元，但時至昨日股價已經跌翻到去34.6元。王傳福噚日講起伯樂股神時侯話，唔清楚股神對比亞迪投資狀况，但有信心未來數年業務繼續增長。

小琴心諗王總噚日精神唔好，都可能同佢嘅工作量有關。有記者噚日問王總，佢身為比亞迪唯一一位執董，幾耐無放過假呢？王總都記唔起自己幾時放過大假，佢仲話自己好享受工作，通常只會喺星期日放吓假咁話，記者又問王總，有無意思搵多個執董入局幫吓手？王總就講，對家管理幾滿意，睇嚟無咩意思改變。