超人大宅 繳140萬差餉地租

【明報專訊】年薪93萬元，喺香港都算係小康，年薪達140萬元，可算係百萬年薪嘅打工皇帝。之不過，即使你年賺93萬，原來都只夠畀華人首富——李嘉誠香港大宅一年嘅差餉，就算你賺到140萬元，也不過啱啱好畀晒超人大宅的「差餉+地租」。

小琴終於明白乜叫「人出雞、你出醬油」都唔掂，就算超人免費畀間大宅小琴「豪住」一年，小琴都冇本事籌到140萬交差餉同地租 。話時話，點解小琴無端端講番超人嘅差餉同地租，事關政府剛檢討完下年度差餉，超人持有自用的南區壽山村道22A、22B 及22C號大宅，新年度需要繳交93.2萬差餉，連同46.8萬元地稅，剛好140萬元。

過去一年樓市大升，一眾前列富豪的大宅租值（於2010年10月1日重估）一年間均水漲船高，升幅介乎20％至約30％。 而「超人」左右手霍建寧，其有「港版凡爾賽宮」之稱嘅深水灣道37號3層高獨立屋，重估後，其租值為723萬元，按年度大升27.5％。

其實新地郭氏自住的深水灣道51至55號，共11幢洋房合共要向庫房進貢155.8萬元差餉，不過該屋苑大部分洋房出租，郭生只住喺部分洋房，所以只需負擔當中一部分差餉。

天匯46樓複式 租值618萬

話時話，西半山天匯頂層繼續成為全港分層住宅租值最貴單位，其中46樓（又稱88樓）A複式單位，最新租值達618.2萬元，仲貴過李澤楷大浪灣道12號嘅611萬元，每年要交成30餘萬元差餉，真係唔嘢少。

報料電郵﹕piano@mingpao.com