阿松冬勝小學搞活動

【明報專訊】有齊前財爺梁錦松「阿松」，加埋「銀行界梁朝偉」嘅匯豐亞太區行政總裁王冬勝，都不及一個「柴九哥」黎耀祥咁受歡迎。噚日小琴去阿松做主席嘅小母牛慈善活動，就見到上述情况。不過阿松同王冬勝全程笑瞇瞇，睇嚟一啲都唔介意被搶鏡喎！

小母牛今年搵咗匯豐銀行，為佢哋每年舉辦嘅「開卷助人」計劃，配對捐款205萬元。噚日喺黃埔一間小學搞咗個校園活動，阿松同王冬勝仲大玩親民，親自落場同班小朋友玩遊戲，但小朋友們都只係咁意拍下手板仔，但柴九哥一出嚟，就博得全場掌聲之餘，仲有熱烈歡呼聲呢！

平時喺記者會上見王冬勝見得多，噚日同小朋友咁親近，佢笑笑口話「幾開心，好過講財經吖！」阿松叱咤財經界，王冬勝喺銀行界無人不識，而黎耀祥咁好戲，當然係電視迷之愛，三位嘉賓都係猛料之人，唔知未來仲會唔會有乜合作呢？