新聞類別
財經
詳情#
【明報專訊】想唔想喺水族館游水？快將開售的恒基灣仔新盤「尚匯」，可以滿足到你，「尚匯」打算起個全港首創嘅摩天玻璃泳池，未來啲住客游水，十足似喺水族館度游水咁。最厲害無論係游水抑或潛水，都可以順便飽覽維港海景，頓感大地在我腳下。咁好feel，終於令小琴明白，點解內地富豪，咁鍾意來香港買豪宅。
根據恒基的介紹，呢個名為「水族館式摩天恒溫泳池」，設於「尚匯」43樓，樓高足足140米，有成大約25米長的水連天玻璃幕牆，產生全透徹水族館效果，樓下告士打道海旁或維港海景，統統盡收眼底。
小琴都識游水，之不過泳術一般，多數係游蛙式，兼且一向畏高，心想喺43樓，游嗰個摩天玻璃泳池，十足十喺星洲金沙的天際泳池游水一樣，隨時愈游愈驚。但從好處去想，若有人喺呢個玻璃泳池學游水，分分鐘一舉兩得，學識游水之餘，兼可練到唔畏高，都咪話唔爽。
講開又講，今時今日，各個發展商無論係賣樓抑或出租商舖，都出盡法寶，例如信和嘅屯門市廣場，剛公布話要動用2個億搞優化工程，還打算加建兩個家庭式洗手間。
屯廣設家庭式洗手間
各位可能問乜叫家庭式洗手間？好簡單，即係一家可以齊齊用。事關有時爸爸帶位小女兒去男廁，抑或媽媽帶位小男孩去女廁，往往諸多不便，今回屯門市廣場起個家庭式洗手間，真係方便唔少家庭，未來安心行商場。
報料電郵﹕piano@mingpao.com
回應 (0)
