羅康瑞黃紹開退下火線

【明報專訊】2011年新人事新景象，噚日有幾位集團靈魂人物都宣布交棒。今年踏入63歲嘅瑞安房地產（0272）主席羅康瑞，宣布退任行政總裁，交棒畀李進港，羅康瑞會繼續擔任主席。而海通國際（0665/ 之前係大福證券）行政總裁黃紹開亦宣布退休，唔再擔任海通任何職位。

羅康瑞：唔係退休

羅康瑞出席業績發布會時公布退下火線，但會保留主席一職，參與大方向制定。佢又話自己唔係退休，仲話唔會畀自己空閒，否則退休就會癲咗。至於係咪有新搞作，佢賣關子話未公開得。而60歲嘅集團董事兼總經理（項目管理）王克活都宣布退休，會出任非全職顧問。49歲嘅李進港會接任行政總裁，佢喺瑞安工作16年，主力內地房地產發展。

黃紹開亦喺海通業績會上話，今年2月過咗70歲生日，係時候退休。執行董事林涌會接任行政總裁。而李明山宣布辭任主席，由非執行董事吉宇光接任。