新地商場送抗輻射包

【明報專訊】日本海嘯引起福島核電廠爆炸，大家都關注輻射情况，天文台噚日話根據風向預測，污染物唔會飄到香港。新鴻基地產（0016）旗下商場apm，就話會加強清潔，今日起會派發「抗輻射窩心包」，包內有預防輻射嘅溫馨提示、口罩、碘酒及便利雨衣等。不過，衛生福利及食物局長周一嶽提醒市民，毋須服食碘片或塗碘酒應對核污染微塵。

另外，香港星巴克發起義賣，為日本災民籌款。喺3月18日（本周五），下晝3至5點，所有飲品收入（不扣除成本）會全數撥捐香港世界宣明會支持日本賑災。今日起亦會喺香港100間分店擺放宣明會嘅籌款箱，顧客可以捐款為救災工作出一分力。而地震發生後，星巴克基金及日本星巴克，已經捐款一億日圓（折算港幣966萬元）予紅十字會，為災民提供援助。