新聞類別
財經
詳情#
【明報專訊】無綫賣盤成事與否，進入倒數階段，電視廣播（0511，TVB）之前嘅通告話，邵氏會喺3月底或之前完成出售股權畀陳國強牽頭嘅財團。而TVB副主席兼董事總經理方逸華噚日話﹕「我月尾先話到你知。」被問到是否一切順利，佢話﹕「我估應該係啩。」
方逸華噚日以邵氏基金會主席身分，出席城市大學「邵逸夫創意媒體中心」命名典禮，基金會捐咗1億元興建大樓鼓勵教學，TVB高層都出席支持，集團副行政主席兼城大副監督梁乃鵬、集團總經理李寶安、總經理陳志雲及陳碧鏵都有撐場，邵逸夫就冇現身。
TVB 1月底公布易主畀陳國強、台灣女首富王雪紅組成嘅財團。早排仲有報道話王雪紅不滿方逸華開出「霸道」條款，包括表明財團只可以派3名代表進入共有11人嘅董事局。被問到有關傳聞時，方逸華話「我完全唔知」，佢話自從簽訂買賣協議後，冇見過王雪紅。咁交易係咪順利？「應該係，月尾至話你知。」
志雲：林峯啲事要問樂小姐
梁乃鵬更直接否認交易出現不和，「我個人相信絕對係謠言。」至於3月係咪完成交易？佢話係上層嘅事，自己冇參與。小琴都有捉住3位總經理打聽詳情，李寶安話交易，就要問股東至知，但打趣地叫小琴，不如問吓陳生（陳志雲）一啲娛樂性豐富啲嘅問題。咁小琴就問吓近期爆出親密照嘅林峯啦，你估陳志雲點答？「林峯要問樂小姐（無綫製作資源總監樂易玲）。」
報料電郵﹕piano@mingpao.com
回應 (0)
