新地瓏璽出紀念郵票

【明報專訊】新樓盤嘅形象要令準買家、又或者廣大市民「入腦」，發展商就真係要絞盡腦汁度吓橋嘞。好似新地（0016）標榜屬系內九龍站豪宅天璽姊妹盤、位於奧運站嘅瓏璽，噚日除咗帶小琴同一眾行家參觀佢哋係深圳嘅展銷廳外，作為新地代理售樓部長勝將軍嘅執行董事雷霆就話，集團會與郵政署合作，發行1888套瓏璽紀念郵票。小琴跑新聞多年，但以往就真係未聽過有新樓盤發行紀念郵票，所以新地呢舖都可以話係一個小小嘅創舉。

講番瓏璽個盤，雖然仲要等官府發出預售樓花紙，但「雷樓神」噚日就話，樓盤他日開波時，會先推出第1、2座嘅1700餘同1900餘方呎嘅4、5房單位先喎。既然係天璽既「續集」，瓏璽既價錢當然並非上車客那杯茶，「雷樓神」話意向呎價2萬銀起，入場費約3500萬元。