索羅斯入股騰訊死對頭

【明報專訊】正當騰訊（0700）公布業績之後股價大插水，死對頭奇虎360已經踏上赴美上市之路，據《華爾街日報》報道，市場傳聞集資少於2億美元嘅360，家獲得超購3倍，仲搵到星級人馬「金融大鱷」索羅斯嘅基金入股，唔知本月30日掛牌時有無機會打破同業優酷網，上市首日股價升1.6倍嘅紀錄呢？

根據360嘅招股書，奇虎360董事長周鴻禕係360嘅最大股東，持股比例為21.5%。以市場估值360價值約78億港元計，周鴻禕手持嘅股份就超過17億港元。如果同馬化騰手執11.1%騰訊股份、市值390億港元相比，當然仲有一大段距離喇。

有內地傳媒話，360董事長周鴻禕已經係11月份先後在香港註冊了3間公司，即係話3Q大戰期間，360已經為上市鋪路，周鴻禕不惜同騰訊展開大戰，令到360吸引國際投資者嘅目光，顯出360周董事長的手腕。不過，舊年11月亦有報道話，周鴻禕原本打算喺11月喺香港見投行，搞上市，但因為受到3Q受累，先搞到泡湯。究竟周總係咪因為想打響名堂先至同騰訊打呢場3Q大戰，真係無人知曉。