好孩子變身BB版比亞迪

【明報專訊】電動車喺近年全球大搞「低碳經濟」下備受追捧，但勢估唔到連嬰兒車都有得搞電動化，好孩子（1086）主席宋鄭還噚日就同小琴講，佢哋每架盛惠兩萬蚊港紙嘅電動嬰兒車今年7月會響意大利推出，唔知會唔會成為「BB版比亞迪（1211）」呢？

宋老闆早排先帶住佢嘅電動嬰兒車同搖籃車響香港做展覽，呢批「電動車」認真唔嘢少，唔單止識自動行駛，可以幫啲媽媽慳力，仲連功能都拍得住真車，竟然有埋避震，咁BB仔就自然瞓得舒服啲啦；不過，科技係有代價嘅，代價就係每架售價1900歐元（約2.1萬港元）。

電動嬰兒車 承惠兩萬一

講起佢哋自家研發，宋老闆話好孩子日本研發中心職員響早排嘅地震海嘯中好好彩全部無事，不過有啲同事就因為交通停頓要行路返屋企囉。

另外話說好孩子前晚出通告話營運總裁梁旭輝職辭唔做，由小琴噚日見到佢前上司王海燁，佢話梁總原來其實一路都好想去寫關於經濟嘅專書，今次辭職原來嚟緊會去南開大學做經濟系教授，實行寓教書於寫書。

王總話，雖然佢而家「親自下海」兼任營運總裁職位，不過嚟緊可能會再響外面請人或者內部提拔做呢個位；佢同梁總私底下仲好好朋友，梁總噚日業績會前仲打畀佢祝佢一切順利添！

報料電郵﹕piano@mingpao.com