基金掃伯明翰 做第2大股東

【明報專訊】香港商人楊家誠擁有嘅英超球會伯明翰（2309），捧走聯賽盃之後，下一個目標，就係逃離降班漩渦，小琴噚日係港交所嘅股權披露發現，伯明翰上個禮拜突然有股權變動，基金公司Astrum Capital喺3月15號（上周二），喺場外斥資約6100萬元，以每股0.2元（比起當日收市價折讓8.3％），買入伯明翰3.05億股，相等於公司9.56%股份，緊隨大股東楊家誠之後，成為伯明翰第2大股東。

捧盃背後 誠哥頻為球會撲水

原來早喺09年8月，Astrum Capital亦曾經用每股平均價0.4元，買入伯明翰（當時稱：泓峰）3.84%股權，但後來呢批股權亦都全數轉手。伯明翰最近為咗確保球會有足夠資金，就連球場、甚至楊家誠嘅私人住宅，都拎去做抵押，呢間神秘嘅Astrum Capital，會唔會係伯明翰嘅救星呢？