朱太開心過龍 認錯寶貝仔

【明報專訊】黃金集團（1031）噚日舉行股東會，表決注入金利豐嘅議案，老闆娘朱李月華會後講吓嚟緊發展大計。唔知係咪議案獲股東通過令朱太興奮，小琴問朱太點解唔見公子Kingston（朱俊浩之洋名），朱太即刻話Kingston今日都喺現場，然後指住遠處一名男士嘅背影大叫「Kingston！Kingston！」但嗰位「Kingston」一啲反應都冇，原來……朱太認錯人！

呢個時候喺朱太側邊嘅朱生即刻爆料，話佢老婆認錯人有前科，除咗今次認錯寶貝仔外，亦試過認錯第二個係朱生！而除咗認錯佢哋兩父子，朱太亦試過認錯車，仲要上到架車發現個司機唔同咗，先知自己上錯車……朱太喺小琴心目中一向都係一位女強人，佢一手湊大嘅金利豐，借殼後市值仲係本港證券商之冠，估唔到原來朱太係大事精明小事失魂喎！

試過認錯老公 認錯車

講返金利豐，由於單刁未完成，朱太話唔方便講得太具體，但肯定嘅就係，借殼上市後金利豐將會北望神州，喺內地搵partner合作，朱生就話未來會加強期貨同資產管理嘅業務喎，咁小琴真係要拭目以待喇。

報料電郵﹕piano@mingpao.com