半新股融創發債失敗

【明報專訊】融創中國（1918）本月初突然擱置發債，究竟係咩原因？噚日出現羅生門，《彭博》通訊引述一名融創嘅職員話，集團取消發債，因為負責發債嘅高盛，意外地將「不能說的秘密」泄露，喺投資者簡介時，講咗集團今年一啲數據預測。無獨有偶，融創早排宣布擱置發債嘅通告，同時披露咗一堆數據預測，包括今年合約銷售額、現金流量同毛利率咁，令呢個講法更加似層層。

彭博引述融創僱員：高盛泄密

小琴即刻搵主席孫宏斌問吓，係咪有件咁嘅事？孫總話公司絕對唔係咁嘅意思，擱置發債只係技術問題，融創會視乎市場情况，再重啟發債大計。咁到時會唔會搵返高盛、德銀同埋渣打（即今次發債牽頭經辦人）幫手？孫總話「幾家投行都蠻專業的」，即係將來仲會有偈傾。

融創澄清職員無權評論

小琴又搵嚟融創企業融資管理部投資者關係專員高曦，問佢點解個通告除咗宣布唔發債，仲公布咁多數據預測，高曦就話呢啲係公開嘅信息，要畀市場知道咁話喎。高盛發言人亦話唔評論事件。

彭博幾個鐘頭後嘅更新版，就引述融創行政總裁助手話，發表呢番言論嘅投資者關係經理，並冇獲授權討論事件，而呢位經理嘅言論，亦唔能夠代表集團睇法。劇情發展至此，又要引述老夫子嘅經典對白：耐人尋味。