北京仲未祝福殼王

【明報專訊】殼王陳國強孖住台灣女首富王雪紅等人，入主無綫（電視廣播/0511），係城中大Deal，自然令人格外關心。小琴本來收到各路人馬的風向，都係話殼王財團，料必獲廣管局批准，之不過，近日小琴聽聞新消息，原來殼王財團家陣都未獲得北京祝福。睇嚟無綫換主變天之事，似乎仲存在暗湧。

另有一位有收北大人風的高人同小琴傾計，雖然佢冇話北京是否未畀祝福，但對殼王似乎大有保留，仲話周街都知佢背後，唔知係代表緊乜人。

廣管就算批 行會可打回頭

其實殼王今次扯頭纜入股無綫，圈中人均知幕後出錢最多的，乃是HTC紅姑，而紅姑貴為寶島首富，雖喺大陸廣設廠房，但始終係台灣人，而無綫嘅重要地位又絕對令北大人事事關心，任何稍了解國情的人都明白，無綫絕對屬於關乎香港穩定的國家安全機構，萬一呢個咁重要嘅機構，由寶島猛人控制，首先必須要令北大人放心，否則廣管局就算批咗，上到行會，一樣可以打回頭。

話時話，08年海嘯前碧桂園的另一位國強仲未籌錢，已先去西環打探中聯辦風聲，結果有咗北京不反對的祝福，先開始搞銀團貸款去馬，唔知今次殼王財團，有沒有做咗呢類「要做但唔講得」的現實政治工作呢？

講開又講，廣管局的風聲確實係話呢單Deal，既無理由也無證據質疑，陳國強係揸fit人，喺咁嘅基礎上面，廣管局只得開綠燈放人。之不過，西環有無直接向廣管局透露北京嘅睇法，咁小琴就唔知，睇埋殼王拍紅姑主掌無綫的大計，六嬸唔一定係攔路虎，入主成敗的砝碼，仲掌喺北大人嘅手中。

報料電郵﹕piano@mingpao.com