台北服務式住宅 最平只係198萬

【明報專訊】台灣向來係小琴最鍾情嘅度假熱點，原因無他，就係機程短，兼有好多好嘢食，但如果能夠係台北擁有一個靚單位，充當「行宮」，就更係一件愜意嘅事！去年底開始進軍寶島代理市場嘅中原，最新動作就係推銷台北嘅服務式住宅「京站i Taipei」，小琴噚日就睇過示範單位嘅相，覺得物業型格味道十足，全無寶島物業過去嘅「娘味」。

來港促銷10伙 附特色裝修

中原亞太區董事總經理陳永傑話，京站i Taipei最大賣點係毗鄰台北車站，絕對係台北市嘅核心地段，今次來港促銷嘅單位有10個，實用面積464至1081方呎，呎價4399至5007元（港幣•下同），由於首3名買家可獲九折優惠，單位入場費198萬元起，樓價都算係小琴那杯茶。

仲有，今次推售嘅10個單位，會附連風格各異嘅室內裝修，包括奢華上海風、日式禪風、時尚米蘭、涵碧樓風格等。