陳子政行過中環 都覺心噏

【明報專訊】東亞銀行（0023）高級顧問兼港交所（0388）董事陳子政（TC）（圖）近年都幾低調。不過小琴八到佢噚日出席香港基督教女青年會嘅「第三屆企業伙伴午餐會」，兼擔任主講嘉賓，小琴梗係走去聽吓TC有咩講啦。

原來TC獲邀講推動企業社會責任，TC就話企業行善嘅動機好簡單，就係為公司建立正面形象，因為今時今日嘅社會，企業品牌可以話係公司最重要嘅資產，同時最忌畀大眾一個不擇手段搵錢嘅觀感。跟住TC就好感慨咁講，次次行過中環，見到好多銀行門口不少苦主打鑼打鼓，都會好心噏，又話呢啲係社會形象，對一間企業來講至為緊要。

小琴心諗，TC「舊舖」花旗銀行，正正就係打鑼打鼓嘅「重災區」之一，難怪喺嗰度打咗廿幾年工嘅TC會心噏。會後小琴捉住TC，問佢做咗東亞高級顧問，會唔會建議東亞搞多啲關乎企業社會責任嘅活動，TC就話呢個係大勢所趨，好似佢出任董事嘅港交所，早排都出咗份幾十頁嘅報告，講港交所點樣履行企業社會責任，所以呢個係所有企業都要諗嘅議題。