富後代做慈善 講究效益

【明報專訊】無論發生任何水災地震，香港人都好捨得捐錢。不過周不時聽到有假冒慈善機構詐騙，或者超高行政費等，令小琴捐都捐得唔安樂。噚日富麗華酒店傅氏家族的傅厚澤（Adrian），同柏寧酒店太子爺陳文耀（Lawrence）喺瑞銀一個論壇分享佢哋成立慈善基金嘅經驗。作為商家後代，就以生意人嘅手段同效率做慈善，務求令一分一毫都用得其所。

傅厚澤嘅爺爺，係比何鴻燊發迹仲要早，澳門第一代賭王傅老榕。呢位富三代主理家族生意，97年樓市大冧之前，以「天價」69億，將富麗華酒店賣畀麗新集團，幾年後先重建成家嘅中環AIA Tower。

投資非洲社企 教人自力更生

Adrian有感要將家族傳統傳落去，喺佢尊翁傅德蔭05年過身後，以遺產成立慈善基金，至今贊助咗72個項目。而Lawrence喺2010年設立嘅正愛慈善基金，除咗內地，項目更有遠至非洲，佢哋就曾經請張學友，為馬拉維感染愛滋病毒嘅小朋友籌款獻唱。

講到佢地做慈善嘅要旨，兩人不約而同強調可持續性，Lawrence話，可能受助人只係諗到呢一刻要食飯、交學費，但更重要嘅係令佢地自力更生，所以佢喜歡「投資」喺當地嘅社會企業，授魚不如授漁。Adrian又話，因為佢地做慣生意，講效益，有時當地NGO都唔多習慣，但相信最終大家都會獲益；佢哋更會拉埋當地政府落水做配對捐款或要佢哋參與，實行將慈善效果leverage up！

大企業家將大部分身家捐出作慈善呢種較為西方嘅文化，喺香港都漸漸被接受，但似乎未喺大陸開花，不過Adrian都體諒佢哋，因為佢都唔支持純粹捐錢，而且大陸富豪通常係白手興家嘅第一代，業務正急速發展，要親自搞慈善都有心無力咁話。

報料電郵﹕piano@mingpao.com