騰訊被質 360上市好得戚

【明報專訊】科網股王騰訊（0700）自從3月公布業績之後，股價一路無起色，噚日仲因為主席馬化騰賭輸期權，搞到股價大跌3%。不過，死對頭奇虎360前日喺美國上市表現就頂呱呱，股價勁升1.34倍。雖然打破唔到視頻網優酷舊年上市首日大升1.7倍嘅紀錄，但已足以令360市值超過300億港元，比內地嘅門戶網站搜狐仲要高，360董事長周鴻禕身家一夜之間暴漲超過30億港元，單單係手持嘅18%股份已經價值56億港元。

周鴻禕開會 叫員工忘記股價

原來360有大約兩成股票係由員工持有，即係話唔少360員工亦都同周鴻禕一樣身家暴漲。周鴻禕就話，係上市儀式之後，接受傳媒訪問，佢話自己「很淡定」，也希望360員工都可以保持淡定。周鴻禕又講，上市只不過係一個新開始，自己返到內地，第一件事就係召集員工開會，目的係要大家忘記股價。小琴心諗，如果有一日，手執住嘅股票一日升超過一倍，我又可唔可以忘記股價，專心做嘢呢？