恒生徐振文摩出海富 20日執400萬

【明報專訊】小琴知道，最近商廈市道都好旺，有分析話可能喺新印花稅令住宅無得短炒，令到一啲投資者及用家都去咗商廈市場。有地產界人士報料，恒生（0011）企業銀行業務總監徐振文透過旗下公司，剛於本月初（日本地震前）以2834.7萬元購入金鐘海富中心一個2100方呎辦公室，相距只約20天，日前便以3250萬元「摩出」，帳面執成400多萬元，認真和味。代理話，由於商廈摩貨新、舊印花稅都唔使畀，近年真係吸引咗唔少投資者。

小琴昨晚即致電Thomas（徐嘅洋名），佢話都唔肯定該物業將來樓價會唔會繼續升，所以賣咗佢。徐原購入嘅辦公室為金鐘海富中心1期704D室，擁維港海景景觀，面積約2100方呎。

丁鵬雲伙任德章 2.2億購灣仔偉興大廈

小琴亦發現，潤迅通信（0989）主席丁鵬雲與多家上市公司包括中國信貸控股（8207）嘅股東任德章，剛透過公司以2.2億元向鎮科集團（0859）主席吳鎮科購入灣仔軒尼詩道188至190號偉興大廈，樓高13層，總面積約2萬方呎。丁、任兩人嘅公司近日才以1.98億元售出灣仔海港中心26樓1、4至8室連兩個車位，不足兩年勁賺1.3億元。