比高愈蝕 星爺愈買

【明報專訊】「星爺」周星馳入主嘅比高集團（8220），雖然業績就麻麻哋，截至去年12月底止第3財季業績仲錄得虧損1577萬元，不過就無阻星爺對公司嘅信心，近日更斥資6000萬增持4億股股份，令到佢嘅持股量升至56.2％。

上月尾比高股價走勢強勁，曾經單日升二成，身為執董嘅周星馳就喺29號分2次於場外增持，以每股平均價0.15元增持約4.1億股份，共斥資6105萬元，亦令其持股由43％升至56.2％。星爺近日嘅增持價比29號當日嘅收市價0.175元低14％；而噚日比高股價已經升至0.196元，比星爺增持價高咗30.6%。

昨日股價已高過增持價三成

不過奇就奇在，星爺喺27號先至在場外減持374萬股，套現咗37.4萬元，轉個頭過咗一個星期，星爺又大手筆增持。

自從星爺入主比高之後，小琴都好留意呢間公司嘅一舉一動，話晒小琴都係睇住星爺嘅戲長大嘅，不過比高嘅業績就似乎無乜起色，截至去年底止第3財季業績，虧損1578萬元，比起09年蝕多1.2倍，公司解釋話，係由於公司業務有變，專注發展的電影娛樂嘅業務開支大咗所致。

不過，星爺入主比高之後，都有注入《長江七號》，仲喺內地推出咗《長江七號》動畫版，集團話會依賴《長江七號》作為長期收入，既然星爺對比高咁有信心，小琴身為影迷都好希望佢嘅如意算盤打得響。

報料電郵﹕piano@mingpao.com