中聚股價插水 累超人輸千萬

【明報專訊】小琴經常聽到有上市公司出問題，股價插水搞到小股東輸錢，但勢估唔到連超人都要中招。停牌超過一個月嘅中聚雷天（0729）噚日公布想向董事鍾馨稼回購佢手上嘅CB（可換股債券），仲可能要因此集資，復牌股價即勁插接近兩成，搞到今年初嘅入股「小股東」李嘉誠帳面要蝕千二萬。

中聚尋日朝早發咗個公告，話會向鍾馨稼回購佢手上個批CB，回購資金會透過控告鍾生索償，不過因為估計法院喺出年之前都唔會審呢單案，所以可能會用公司內部資源回購CB，唔夠嘅話仲可能會借錢或者集資。

好在鉑陽生性 應該仲有賺

呢個公告一出恐怕即刻嚇親唔少投資者，小琴計過數，中聚上年買電動車電池業務嗰陣，總共發咗24.93億港紙嘅CB，如果按鍾生當時持電池業務41%計算，佢手上嘅CB約莫值10.22億左右，但係公司喺上年中期報告中持有現金得5億幾，邊度夠買？

果然噚日中聚一復牌股價即刻插水，最多曾經跌超過三成，收市跌18.6%到0.7元，即係話用咗每股0.73元買咗4億股嘅超人帳面蝕咗1200萬，好彩佢另一隻愛股鉑陽（0566）生性勁升16%，睇怕兩者加埋都仲有賺添。