恒大中超響頭炮

【明報專訊】呢排英超聯開始轉入直路，但各位球迷又知唔知中超聯新球季開鑼喇，愛波之人恒大（3333）主席許家印擁有嘅中超升班馬廣州恒大，喺上個禮拜六就參與中超開幕戰。廣州恒大為隆重其事，豪花5000萬元人民幣喺廣州主場打咗場史無前例嘅中超開幕式，許家印更加用咗成個月費盡心思，為中超開幕式主題曲《崛起》作詞！

許家印為中超開幕曲填詞

小琴都知到大家一定好想欣賞一下，許家印博士嘅文筆，所以節錄部分《崛起》歌詞，公諸同好。

「男子漢 跟我走，狂奔燃燒熱汗流。

向前沖，昂起頭！炎黃子孫齊加油！

丈夫崛起高昂首，騰身一躍向勝利衝鋒！」

大家睇到呢，有無想即刻落場踢波嘅衝動呢，結果廣州恒大就喺呢首嘅《崛起》激勵之下，1比0贏咗傳統勁旅大連實德。唔單止球隊表現有板有眼，恒大近期股價亦都走勢強勁，連升4日，噚日更加一度創出4.99元嘅新高，相信許家印呢排都心情大靚。