國美千二萬送走陳曉

【明報專訊】國美（0493）人事變動塵埃落定，支持陳曉嘅人可能有啲失落，不過睇返國美噚日出嘅年報，雖然陳曉敗走，但國美舊年就用咗超過千二萬人仔「送走」佢，陳曉都叫有啲得着吖！

年報：「揚帆起航」隻字不提陳曉

睇返國美2010年度年報，封面係一隻具古典風味、有啲似電影《魔盜王》入面嗰隻海盜船「黑珍珠」嘅帆船，第一頁嘅標語係「揚帆起航、乘風破浪」，頗有「起錨」嘅意味。公司控制權清晰晒，「掌舵人」又由陳曉變為張大中，國美的確係時候起錨嘅。

雖然陳曉2010年全年都坐喺國美嘅董事局，但係本年報嘅管理層介紹一欄，就對陳生隻字不提，上個月先履新嘅主席張大中就大大幅靚仔相，充分體現咩叫「人走茶涼」。不過陳曉都唔使太黯然神傷，話晒國美舊年出咗500幾萬人工，加埋超過700萬嘅認股權畀佢，夾夾埋埋接近成1250萬人仔，比起09年多成倍，亦係成個董事局入面薪酬最高嘅董事，都算有啲安慰。

至於黃光裕胞妹黃燕虹，因為喺舊年12月先獲委任為國美非執董，所以2010年冇董事袍金落袋。貝恩資本嘅代表竺稼作為非執董，少少哋都收咗9.5萬蚊袍金。

報料電郵﹕piano@mingpao.com