烏輪買家再爆新版本

【明報專訊】高盛「烏輪」事件鬧到滿城風雨，事發至今超過成個禮拜仍然未解決，條街就已經謠言滿天飛。探子回報，瑞銀盤房有份炒4隻「肇事」窩輪，仲要係好大手買。高盛曾經私下同瑞銀有關人士接觸，意圖拆掂佢，其中隻日經Call輪10073，高盛建議用停牌前高位1元回購，瑞銀就唔收貨，美資大行同歐資大行「拗手瓜」，所以單嘢到依家仲處於膠着狀態。

于正人：冇接過高盛電話

其實市場一早傳話今次4隻日經輪，係畀部分機構投資者洞悉文件錯誤之後入市挾高，不過睇返停牌當日買入10073啲牌，只得一個來自瑞銀。當然，單憑個牌無法知道真正買家何許人。小琴就打畀瑞銀亞洲股票衍生產品銷售部董事總經理于正人問個究竟，尊尼（于之洋名）對呢個傳言抱懷疑態度，因為作為發行商，其實未必知道究竟對手係邊個，其二，就係佢哋部門冇接過高盛嘅電話囉！

高盛發言人亦都話，絕對唔會選擇性接觸有關窩輪持有人，因為佢哋對所有投資者一視同仁，而現階段高盛仍然係同監管機構開會，商討復牌安排。

高盛：唔會選擇性接觸持有人

有業內人士就話，希望高盛快快趣趣解決件事，因為成單嘢已經影響咗投資者買輪嘅信心。業內人士仲建議，高盛可以保障投資者為由，沿用番最初嗰條方程式，以10073為例，復牌後以1.5蚊開買盤唔開沽盤，相信大部分散戶都會開心走貨，高盛亦好落台。不過，如果高盛「夠膽」用「更正」後嘅方程式開個幾仙嘅價，業內人士相信會有人瞓喺長江中心即高盛辦公室樓下喎！

報料電郵﹕piano@mingpao.com