資本策略Mico鍾：甲級商廈呎價 可上3萬

【明報專訊】小小超李澤楷的左右手Mico鍾（鍾楚義），呢幾年將啲精力放晒落佢自己做老闆嘅資本策略（0497）上，主力做物業買賣，適逢近兩、三年個市係咁上，Mico密密手買賣商廈，都執唔少。Mico昨日同小琴講，市場錢太多，美元貶值，資產有價，家啲住宅升到咁，寫字樓價冇理由差咁遠，近日已經頻頻創新高，佢估甲級寫字樓呎價3萬蚊，指日可待。

資本策略舊年15億賣咗國衛中心9層，年底又賣咗尖沙嘴模漢大廈，賣價近14億，其實兩單都已經賺好多，但家寫字樓係咁升，唔知Mico有冇覺得賣早咗。但係資本策略好彩仲揸住國衛中心8層；另外，新晉影帝謝霆鋒間製作公司租咗幾層嘅當紅「食廈」銅鑼灣「Cubus」，資本策略都有份。有資產在手，都可以繼續受惠呢個浪。

專吼中環細項目 做精品豪宅

Mico話資本策略成立咗間全資附屬公司Couture Homes，專做精品豪宅，請嚟香港知名設計師梁志天幫手，跑馬地藍塘道係第一炮。佢話自己公司同大發展商冇得鬥，所以專吼港島中環、蘭桂坊一帶嘅細項目，走接近度身訂做嘅精品豪宅路線，希望margin高啲。除咗香港，Couture Homes都喺上海睇緊發展機會。